२०७९ आश्विन २९, शनिबार १३:२१
पाल्पा,
पाल्पा जिल्लामा गएको भदौ महिनाको तुलनामा असोज महिनामा चार गुणाले डेङ्गु सङ्क्रमित बढेका छन्। चालू आर्थिक वर्षको भदौ महिनामा १३४ जनामा डेङ्गु सङ्क्रमण भएकोमा असोज महिनाको हालसम्म ४२९ जनामा डेङ्गु सङ्क्रमण पुष्टि भएको स्वास्थ्य कार्यालय पाल्पाले जनाएको छ।
गत भदौ महिनाको तुलनामा चार गुणाले असोज महिनामा डेङ्गुका बिरामी बढेको स्वास्थ्य कार्यालय पाल्पाका प्रमुख डा. राजेन्द्र गिरीले जानकारी दिनुभयो। असोज महिनादेखि तीव्र गतिमा बढेको डेङ्गु सङ्क्रमण हालसम्म पनि अवस्था उस्तै देखिएको उहाँले बताउनुभयो। जिल्लाका विभिन्न अस्पताल तथा निजी स्वास्थ्य संस्थामा गरिएको परीक्षणमा अधिकांश बिरामीमा डेङ्गु सङ्क्रमण पुष्टि भएको र अस्पतालहरू डेङ्गुका बिरामीले भरिएको उहाँले बताउनुभयो।
