Archives


सभापतिको रिहाइको माग गर्दै बन्दका कारण बाँकेको जनजीवन प्रभावित

 कार्तिक २९ 

अबैध हतियारसहित पक्राउ परेका तरुणदलका नेपालगन्ज नगर सभापतिको रिहाइको माग गर्दै नेपाल तरुणदल बाँकेका बन्दका कारण शुक्रबार बिहानैदेखि नेपालगन्जको जनजीवन प्रभावित भएको छ ।

बन्दका कारण सार्वजनिक यातायात चलेका छैनन् भने विद्यालय पनि बन्द रहेको छ । बन्दका कारण कलकारखाना तथा व्यापार व्यावसाय समेत प्रभावित भएका छन् ।

बाँके प्रहरीद्वारा अबैध हतियारसहित तरुणदलका नेपालगन्ज नगर सभापति संदिपजंग शाहलाई गत कात्तिक १४ गते साँझ नेपालगञ्ज–२० मा रहेको नमस्ते भिलेज रेस्टुरेन्टबाट अबैध अमेरिकन लोडेड पेस्तोल र त्यसको २ थान गोलीसहित पक्राउ गरेको थियो ।

नेता शाहीको रिहाईको माग गर्दै आज विहानदेखि नेपालगन्जमा विरोध प्रदर्शन गरिएको छ । प्रहरी प्रशासनले सत्ताको आडमा आफ्ना कार्यकर्ताहरुलाई अनाहकमा दुख दिएको भन्दै बन्द आव्हान गरीएको छ ।

बन्द आव्हानकर्ताहरु शुक्रबार बिहानैदेखि नेपालगन्जको बीपिचोक र कोहलपुर चौराहमा झण्डासहित प्रदर्शन गर्नुको साथै आवागमन ठप्प पारेका छन् । तरुण दल बाँकेले प्रहरीले नगरसभापति शाहलगायत आफ्ना कार्यकर्तालाई अनाहकमा दुख दिएको भन्दै चरणबद्ध आन्दोलनमा छ ।

तरुण दलको झण्डासहित नेपाली काँग्रेसका नेता कार्यकर्ताहरु शुक्रबार बिहानैदेखि नेपालगञ्जको सुर्खेतरोडका विभिन्न चोकहरुमा तैनाथ रहेका छन् । बन्दको पूर्व सन्ध्यामा तरुण दलले बिहीबार साँझ राँके जुलुससमेत निकालेको थियो ।

तपाइ मन पर्न सक्ने अन्य
टिप्पणीहरु
लोडिङ...