Archives


प्रदेश राजधानी सर्वसम्मत तोकिन्छ : प्रवक्ता चौधरी

पुष २ बुटवल

प्रदेश पाँच सरकारका प्रवक्ता भौतिक पूर्वाधार तथा बिकास मन्त्री बैजनाथ चौधरीले ३ नं. प्रदेशको निर्णयलाई नजिर बनाएर ५ नं. प्रदेश राजधानी तोकिने बताउनु भएको छ । प्रदेशको नाम र राजधानी तोक्ने विषयमा सरकारले सर्वसम्मत निर्णय गर्न खोजको बताउँदै उहाँले सर्वसम्मत हुन नसके बहुमतकै आधारमा हुने पनि बताउनु भयो । ‘तीन नं. प्रदेशले पहिले निर्णय गर्यो भने हामीलाई पनि सजिलो हुन्छ ।’ उहाँले भन्नुभयो–‘३ नं. प्रदेशको अस्थायी राजधानी हेटौडा पनि एउटा छेउमा छ, उसले हेटौडा नै तोक्यो भने त्यसैलाई नजिर बनाएर हामीलाई पनि बुटवल तोक्न सजिलो हुन्छ ।’
रिपोटर्स क्लवले बुधबार बुटवलमा आयोजना गरेको कार्यक्रममा बोल्दै मन्त्री चौधरीले प्रदेशको राजधानी र नामाकरण सकेसम्म सहमतीमै तोक्ने बताउँदै सहमति हुनै सकेन भने बहुमतका आधारमा नै हुने बताउनु भयो । राजधानी तोक्ने र प्रदेशको नामाकरण गर्ने सांसदको बिशेषाधिकार भएकाले पार्टीको ह्वीप पनि नलाग्ने उहाँले बताउनु भयो । प्रदेशको राजधानी तोक्ने र नामाकरण गर्ने विषय राजनीतिक बिषय भएकाले मुख्यमन्त्री शंकर पोखरेलले स्थायी कमिटि बैठकमा समेत पार्टीले एउटा धारणा बनाओस् भन्नुभएको उल्लेख गर्नुभयो । प्रदेश सभा सदस्यहरु पनि कुनै न कुनै दलमा भएकाले राजनीतिक सहमति जुट्यो भने राजधानी तोक्न र नामाकरण गर्न सजिलो हुने उहाँको भनाई थियो । ‘सर्वसम्मत होस भन्ने हाम्रो पनि चाहना हो, त्यो भएन भने भोटिङ्मा जान्छ ।’ उहाँले भन्नुभयो । चुनावका बेला दाङ् तथा आसपासका नेताहरुले दाङ् राजधानी बनाउँछु र बुटवलका तथा आसपासका नेताहरुले बुटवल राजधानी बनाउँछु भनेर भोट मागेका कारण राजधानी तोक्ने काम जटिल बनेको उहाँको भनाई छ । पार्टीले एक प्रकारको धारणा बनायो भने नेताहरुलाई आफ्ना मतदातालाई भन्न पनि सजिलो हुने भएकाले पार्टीले पनि धारणा बनाउनु पर्ने उहाँले उल्लेख गर्नुभयो ।

तपाइ मन पर्न सक्ने अन्य
टिप्पणीहरु
लोडिङ...