तिहारको चौथो दिन आज गाई र गोरुको पूजा गरी मनाइँदै

जन आवाज अनलाईन

यमपञ्चक तथा तिहारको चौथो दिन आज गाई र गोरुको पूजा गरी मनाइँदै छ। गाईबाट आमा पाए जस्तै माया पाइने धार्मिक विश्वासमा गाई पूजा गर्ने परम्परा बसेकोे हो।

गाईको दूध, गहुँत र गोबर पवित्र हुने भएकाले पनि गाईको पूजा गर्ने गरिएको हो। गाईको पूजा गरी आजका दिन मीठा–मीठा परिकार खान दिए गाईबाट पाइने शुद्धता सधैँ प्राप्त हुने धार्मिक विश्वास छ। नेपालका कतिपय भाग र केही समुदायमा कात्तिक कृष्ण औँसीकै दिनमा गाईपूजा गर्ने परम्परा रहे पनि औँसीको अन्त्य र प्रतिपदाको शुरुमा गाई पूजा गर्नुपर्ने शास्त्रीय मान्यता रहेको छ।

आज गाईपूजा गरी जनै पूर्णिमाका दिन दाहिने हातमा बाँधिएको रक्षाबन्धन गाईको पुच्छरमा बाँधिदिएमा मृत्युपश्चात गाईले स्वर्ग जानका लागि वैतरणी नदी तारिदिने धार्मिक विश्वाससमेत रहेको छ। आजै आँगनमा लिपपोत गरी गाईको गोबरको पर्वत बनाई त्यसलाई गोवर्द्धन पर्वत मानी पूजा गर्ने गरिन्छ। यसै अवसरमा पशुपतिमा रहेका गाईको पूजा गरिएको छ।

तपाइ मन पर्न सक्ने अन्य
टिप्पणीहरु
लोडिङ...