२०८० श्रावण १७, बुधबार २०:१८
चितवन, १७ साउन । राष्ट्रिय स्वतन्त्र पार्टी रास्वपा का सभापति रवि लामिछानेले आफू निर्वाचित भएको एक सय दिनको अवसरमा आफ्नो क्षेत्रका लागि विशेष कार्यक्रम सार्वजनिक गर्नुभएको छ । उहाँले आज बुधवार एक कार्यक्रमकाबीच निर्वाचन क्षेत्र विशेष कार्यक्रमको घोषणा गर्नुभएको हो ।
घोषणा गरिएका कार्यक्रममा महिलाका लागि एउटा बस आफ्नो निर्वाचन क्षेत्रमा आजैदेखि निःशुल्क सञ्चालन गर्ने उल्लेख गर्नुभएको छ । पार्टीको झण्डामा प्रयोग भएको रङ्ग निलो भएकाले बसलाई ुब्लु बसु भनिएको छ ।बसमा महिलामात्र चढ्न पाउने छन् । बस चितवन क्षेत्र नम्बर २ का सहरी क्षेत्रमा सञ्चालनमा आउने छ । बस चढ्नेहरूका लागि कार्ड वितरण गरिने छ । बसभित्र महिलाका लागि अत्यावश्यक सामग्रीसँगै सांसद लामिछानेलाई चिठी राख्ने ठाउँको व्यवस्था हुने छ । लामिछानेले चुनावको समयमा घोषणा गर्नुभएको विदेशमा रहेका एक सय जनालाई नेपालमा रोजगारीको घोषणा गर्नुभएको छ । उनीहरूलाई मासिक ४० हजारदेखि एक लाख ५० हजार रुपैयाँसम्मको तलबको व्यवस्था हुने छ ।
लामिछानेले हरेक चार,चार महिनामा सार्वजनिक सुनुवाइ गर्ने भन्दै पहिलो कार्यक्रम आउँदो भदौ १० गतेका लागि घोषणा गर्नुभएको छ । ६५ वर्षमाथिका ज्येष्ठ नागरिकलाई लक्षित गर्दै मोबाइल क्लिनिक सञ्चालनमा ल्याइएको छ । त्यसमा मेडिकल अधिकृतसहितको स्वास्थ्यकर्मीको समूहले घरमा नै पुगेर सेवा दिने छ । थप उपचार आवश्यक परेमा परामर्श गरी अस्पताल पठाउने व्यवस्था मिलाइने भएको छ ।
उहाँले स्वास्थ्य चितवन अभियानअन्तर्गत आफ्नो क्षेत्रका विपन्न नागरिकलाई पाँच लाख रुपैयाँ बराबरको स्वास्थ्य बीमा कार्यक्रम शुरु गरिने बताउनुभयो । पहिलो चरणमा एक सय जनालाई समावेश गरिने छ ।
लामिछानेले पहिलो चरणमा दुई विद्यालयका कक्षा ११ र १२ लाई नमुना विद्यालयका रूपमा विकास गर्ने बताउनुभएको छ । भरतपुर महानगरपालिकाको रामनगर मावि र कालिका नगरपालिकाको चतुर्मुखी माध्यमिक विद्यालयका कक्षा ११ र १२ का विद्यार्थीलाई पहिलो चरणमा उत्कृष्ट शिक्षा दिएर ती दुई विद्यालय नमुना बनाइने छ । यससँगै अन्य कक्षा र अरू विद्यालय नमुना बनाउँदै लगिने छ । उहाँले इच्छाकामनाको भाराङ्को आधारभूत विद्यालयलाई नमुना शैक्षिक संस्थाका रूपमा विकास गरी आवासीय विद्यालय बनाउन शुरु गरिएको जानकारी दिनुभयो ।
कार्यक्रमको घोषणाका क्रममा नारायणगढ–मुग्लिन सडकमा वर्षाको समयमा यात्रुले दुःख पाउने गरेको भन्दै उहाँले २० जनाको स्वयंसेवी समूह ९आरएटी० परिचालन गरिने बताउनुभयो । वर्षाको समयमा मात्र यो र्यापिट एक्सन टिम परिचालन हुने छ । उहाँकै कार्यक्रममा आफूले प्राप्त गरेको मत ५४ हजार एक सय ७४ बराबर फलफूल र अन्यका बिरुवा निर्वाचन क्षेत्रमा रोपिने जनाइएको छ । मतदाताको सम्मानमा एक मत एक बिरुवा रोप्न लागिएको हो । कार्यक्रमका लागि आवश्यक बजेट जुटाउन चितवन क्लब गठन गरिने छ ।
क्लबमा विदेशमा रहेका चितवनवासीलाई समावेश गरेर आर्थिक सहयोग जुटाइने उहाँले बताउनुभयो । लामिछानेले आजै भरतपुरको बसेनीमा सम्पर्क कार्यालय स्थापना गर्नुभएको छ । कार्यालयमा प्रमुख कार्यकारी अधिकृतका रूपमा हेमन्त बराललाई नियुक्त गरिएको छ । कार्यालयको लामिछानेसहित पार्टीका नेताले घण्टी बजाएर उद्घाटन गर्नुभएको हो ।
लामिछाने पहिलो पटक निर्वाचित भएपछि नागरिकताको विवादका कारण सर्वोच्चको फैसलासँगै पद रिक्त भएको थियो । उपचुनाव भएर दोस्रो पटक निर्वाचित भएको आज एक सय दिन पुगेको हो ।
