२०८० आश्विन २४, बुधबार १४:०२
जेरुसेलम –
इजराइल–हमास द्वन्द्वमा १२ सयभन्दा बढी इजराइलीहरुको मृत्यु भएको इजराइलको प्रतिरक्षा फौज ९आईडीएफ० का प्रवक्ताले बुधबार बताएका छन् । यो संख्या यसअघि बताइएको भन्दा २ सयले बढी हो । यसअघि १ हजार जनाको ज्यान गएको जानकारी दिइएको थियो। “मृत्यु हुनेको १२ सय पुगेको छ”, आईडीएफका प्रवक्ता लेफ्टिनेन्ट कर्णेल जोनाथन कन्रिकसले एक भिडियो मेसेजमा भने । उनले मारिनेहरुमा अधिकांश सर्वसाधारण पनि रहेको जानकारी दिए ।
यसैबीच, इजराइलले गाजापट्टीमा रातभर गरेको हवाई हमलामा कम्तीमा ३० जनाको मृत्यु भएको र सयौं घाइते भएको हमास सरकारका एक अधिकारीले बुधबार बताएका छन् । हमास सरकारको सञ्चार कार्यालयका प्रमुख सलमा मरुफले इजराइली हमलामा दर्जनौँ आवासीय भवन, कारखाना, मस्जिद र पसलहरु प्रभावित भएको एएफपीलाई जानकारी दिए । इजराइली सेनाले पनि रातको समयमा हमासका थुप्रै लक्ष्यमा आक्रमण गरेको पुष्टि गरेको छ । एएफपी
