२०८० फाल्गुन २२, मंगलवार २०:२४
बुटवल
प्रतिष्ठित सामुदायिक शिक्षण संस्था सिद्धार्थ गौतम बुद्ध क्याम्पस बुटवलका नवनियुक्त सहायक क्याम्पस प्रमुख नियुक्त हुनुभएका उप(प्राध्यापक द्वय कृष्ण प्रसाद खनाल र रामनाथ उपाध्याय एवं भाषा तथा साहित्य विभागको विभागीय प्रमुख रिता रेग्मीको पदभार कार्यक्रम सम्पन्न भएको छ ।
क्याम्पसमा २०६३ सालदेखि हालसम्म लेखाशास्त्र बिषय प्राध्यापनरत खनाल, वित्तशास्त्र बिषय प्रध्यापनरत उपाध्याय एवं नेपाली बिषय प्रध्यापनरत रेग्मीले यस अघि पनि क्याम्पसको सहायक क्याम्पस प्रमुख, कार्यक्रम संयोजक र विभागिय प्रमुखको रूपमा प्रशासनिक र शैक्षिक जिम्मेवारी सफलता पुर्वक निर्वाह गर्नुभएको थियो ।
क्याम्पस प्रमुख कृष्ण प्रसाद शर्माको अध्यक्षता एवं सन्चालनमा सम्पन्न भएको पदभार कार्यक्रममा नव नियुक्त सहायक क्याम्पस प्रमुख र विभागीय प्रमुखलाई पब्लिक क्याम्पस प्राध्यापक संघका सभापति गोपाल प्रसाद चापागाईं, पब्लिक क्याम्पस कर्मचारी संघका सभापति ओमभद्र गौतम, प्रजातान्त्रवादी प्राध्यापक संघका सभापति तारा प्रसाद ज्ञवाली, प्रगतिशील प्राध्यापक संगठनका अध्यक्ष भुपाल शर्मा र प्राज्ञिक परिषदका अध्यक्ष चुन्नु प्रसाद पौडेल लगायतले बधाई तथा शुभकामना मन्तव्य राख्नु भएको थियो ।
कार्यक्रममा नव नियुक्त सहायक क्याम्पस प्रमुख र विभागीय प्रमुखले जिम्मेवारी दिएकोमा क्याम्पस प्रमुखलाई धन्यवाद दिदै क्याम्पसको बिधान नियमावली एवं विश्व बिधालयको प्रचलित मापदण्ड अनुसार क्याम्पसका सरोकारवालाहरु संगको साथ र समन्वयमा आफ्नो जिम्मेवारी निर्वाह गर्ने प्रतिबद्धता व्यक्त गर्नु भएको थियो ।
