२०७९ बैशाख ४, आईतवार १५:४४
काठमाडौं । टेस्ला तथा स्पेस एक्स कम्पनीका सीईओ एलन मस्क संसारकै सबैभन्दा धनी व्यक्ति हुन् । मस्कले हालै सोसल मिडिया कम्पनी ट्वीटरको करीब १० प्रतिशत शेयर खरीद गरी कम्पनीको सबैभन्दा ठूलो शेयरहोल्डर बनेका छन् । त्यतिमात्र होइन मस्कले ४३ अर्ब डलरमा पूरै ट्वीटर कम्पनी नै खरीद गर्ने प्रस्ताव समेत गरेका छन् । मस्कको उक्त प्रस्तावका बारेमा ट्वीटरको बोर्डमा समेत छलफल भएको छ । २ खर्ब १९ अर्ब डलरका मालिक मस्कले ट्वीटर मात्र होइन हाल आर्थिक संकटमा फसिरहेको मुलुक श्रीलंका नै खरीद गर्न कतिपयले सल्लाह दिएका छन् । स्नापडिल कम्पनीका सीईओले मस्कलाई यस्तो सुझाव दिएका हुन् ।
सीईओ कुणाल बहलले ट्वीटर खरीद गर्नुको साटो श्रीलंका खरीद गरेर आफ्नो नाम ‘सिलोन मस्क’ राख्न पनि मस्कलाई सुझाव दिएका हुन् । उनले ट्वीटरमा लेखेका छन्– ट्वीटर खरीद गर्न एलन मस्कको प्रस्ताव ४३ अर्ब डलर, श्रीलंकाको ऋण ४५ अर्ब डलर । उनले श्रीलंका खरीद गरेर आफूलाई सिलोन मस्क बनाउन सक्दछन् ।
स्मरण रहोस् मस्कले गत अप्रिल ४ मा ट्वीटर कम्पनीको ९।२ प्रतिशत शेयर खरीद गरेका थिए । तत् पश्चात् ट्वीटरका सीईओ पराग अग्रवालले एलन मस्कलाई ट्वीटरको बोर्डमा सामेल हुने प्रस्ताव गरेका थिए । तथापि मस्कले ट्वीटर बोर्डमा सहभागी हुन अस्विकार गरे र एक्कासी ४३ अर्ब डलरमा कम्पनी नै खरीद गरिदिने प्रस्ताव अगाडि सारे ।
ट्वीटरमा लगानी गरिसकेपछि आफूलाई हालको अवस्थामा ट्वीटर फस्टाउन नसक्ने र विद्यमान स्वरुपमा सामाजिक अनिवार्यतालाई पूरा गर्न समेत नसक्ने अनुभूति भएको भन्दै मस्कले ट्वीटरलाई एक निजी कम्पनीको रुपमा परिणत गर्नु आवश्यक रहेको बताएका छन् ।
–एजेन्सी
