२०८० आश्विन २७, शनिबार १८:३७
काठमाडौं ।
अब सवारी चालक अनुमति पत्र ९ड्राइभिङ लाइसेन्स० को आवेदन र नवीकरण दस्तुर अनलाइनबाट तिर्न सकिने भएको छ । पहिलो चरणमा ललितपुरस्थित यातायात व्यवस्था कार्यालय, एकान्तकुनाबाट यो सेवा सञ्चालन हुन लागेको हो ।
बिहीवार एक कार्यक्रम गर्दै अनलाइन माध्यमबाट राजस्व भुक्तानी गर्न सकिने सेवाको उद्घाटन गर्न लागेको उक्त कार्यालयका प्रमुख राजकुमार कपालीले जानकारी दिए । उनका अनुसार दोस्रो चरणमा दशैंपछि उपत्यकाका यातायात व्यवस्था कार्यालय र तेस्रो चरणमा देशैभर यो सेवा लागू हुनेछ ।
“सवारी चालक अनुमति पत्रका लागि व्यक्ति आफैंले अनलाइन फाराम भरेजस्तै रकम पनि अनलाइनबाटै भुक्तानी गर्न सकिने सेवा सुरु हुँदैछ,” कपालीले टेकपानासँग भने, “त्यसपछि सेवाग्राहीले अनलाइनबाटै रकम भुक्तानी गर्न सक्नेछन् भने कार्यालयमा बायोमेट्रिक्स र मेडिकलका लागि मात्र उपस्थित हुनुपर्नेछ ।”
अनलाइन माध्यमबाट भुक्तानी गर्न सकिने सेवा सुरु भएपछि कार्यालयमा कामको भार ५० प्रतिशतले घट्ने उनको विश्वास छ । उनका अनुसार सवारी चालक अनुमति पत्र नवीकरण र सवारी चालक अनुमति पत्रको नयाँ फाराम भरिसकेपछि बुझाउनुपर्ने ५०० रुपैयाँ अनलाइन प्रणालीबाटै भुक्तानी गर्न सकिनेछ ।
“त्यसको केही समयपछि नै ट्रायल पास भइसकेका सेवाग्राहीको रकम पनि अनलाइनबाटै भुक्तानी गर्न सकिने कामको तयारी भइरहेको छ,” उनले भने, “एक वर्ष भित्रमा यस कार्यालयमा नगद भुक्तानी गर्नै नपर्ने अवस्था सिर्जना गर्नेगरी काम भइरहेको छ ।”
