२०८० कार्तिक १४, मंगलवार ११:०३
काठमाडौं ।
नेकपा एमालेका अध्यक्ष केपी शर्मा ओलीले व्यवसायी दुर्गा प्रसाईंलाई आफूले कम्बोडियामा ३० अर्ब लगानी गरेको पुष्टि गर्न चुनौती दिएका छन् । उनले उक्त आरोप पुष्टि गरे एक हजार रुपैयाँ थपेर दिनेसमेत बताएका छन् ।सोमबार पोखरामा पार्टीको प्रदेशस्तरीय कार्यक्रमलाई सम्बोधन गर्दै अध्यक्ष ओलीले एमालेलाई बदनाम र कमजोर पार्न आफूमाथि यस्ता आरोपहरु आइरहने पनि बताए ।
‘कम्बोडियामा ३ हजार करोड मैले राखेको छु भने धेरै नाफा हुने विजनेस दिन्छु,’ ओलीले भने, ‘देशको यत्रो पैसा लुकाएको रहेछु भने पत्ता लगाउनुस्, धेरै त छैन एक हजार रुपैयाँ थपेर सबै दिन्छु।’व्यवसायी दुर्गा प्रसाइले केही दिनअघि ओलीले कम्बोडियाको टेलिकममा ३० अर्ब लगानी गरेको बताएका थिए।अध्यक्ष ओलीले आफू र श्रीमतीका नाममा भएका सबै सम्पत्ति दान गरिसकेको र अर्काका लागि भ्रष्टाचार नगर्ने बताए।
