२०७८ चैत्र २५, शुक्रबार १३:००
काठमाडौं– देशमा स्थानीय तहको निर्वाचन तयारी तीव्र भएको बेला गीतसंगीत मार्फत जनचेतना जगाउने क्रम बढेको छ ।
जनताको अमूल्य भोट पाएर जितेका जनप्रतिनिधिले देश र जनताका लागि के के योगदान दिए र भोटका लागि कस्ता प्रलोभन देखाउँछन् भन्ने कुरा समेटिएको गीत जुनै जोगी आएनि कानै चिरेका सार्वजनिक भएको छ ।
तिलक बस्नेत र सोनिका लामाको आवाज रहेको गीतमा तिलक बस्नेतकै शब्द र संगीत रहेको छ । गीतमा सुदीप सागरको संगीत संयोजन रहेको छ ।
तिलक बस्नेतको निर्देशनमा बनेको भिडियोमा जनताले चुनेर सत्तामा पुर्याइएका नेताहरूले कसरी जनताको भावनासँग खेलिरहेका छन्, अब जनताले कस्ता प्रतिनिधि चुन्ने भन्ने विषयवस्तु देखाउन खोजिएको छ ।
भिडियोमा ऋषि धमला, प्रकाश बस्नेत, सनत शर्मा, रक्षा बस्नेतको अभिनय रहेको छ । विबेक विकको छायांकन रहेको भिडियोलाई अमृत चापागाँईले सम्पादन गर्नुभएको छ ।
